ជប៉ុន: កីឡាករជនពិការ ផ្នែករទេះប៉ារ៉ាឡាំពិកកម្ពុជា វ៉ាន វ៉ុន បានឆ្លងផុតវគ្គជម្រុះឡើងទៅប្រកួតវគ្គផ្តាច់ព្រ័ត្រ ប៉ារ៉ាឡាំពិកពិភពលោក នៅទីក្រុងតូក្យូ ប្រទេសជប៉ុន បន្ទាប់ពីទទួលបានចំណាត់លេខ២ ក្នុងសេរីទី១ ខណៈកីឡាករថៃ ចំណាត់ថ្នាក់លេខ១។

លទ្ធផលខាងលើនេះកីឡាករថៃ និងកីឡាករ វ៉ាន វ៉ុន របស់កម្ពុជាឡើងទៅប្រកួតវគ្គផ្តាច់ព្រ័ត្រ ដែលធ្វើឡើងនៅម៉ោង១៥:៣០នាទី រសៀលនៅថ្ងៃទី១ ខែកញ្ញា ឆ្នាំ២០២១នេះ។

គួរបញ្ជាក់ថាការប្រកួតវគ្គជម្រុះលើវិញ្ញាសាប្រណាំងរទេះចម្ងាយ១០០ម៉ែត្រ ចែកចេញជា៣សេរី ដោយក្នុងមួយសេរីមានកីឡាករ៦នាក់ មកពី៦ប្រទេស។ ជ្រើសរើសយកលេខ១ និងលេខ២ ក្នុងសេរីនីមួយៗ ទៅកាន់វគ្គផ្តាច់ព្រ័ត្រ ដណ្តើមមេដាយតែម្តង។

លោក យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា បានសម្ដែងនូវសេចក្ដីត្រេកអរ និងកោតសរសើរ ចំពោះការខិតខំប្រឹងប្រែងរបស់កីឡាករ វ៉ាន វ៉ុន ដែលធ្វើបានយ៉ាងល្អ និងបានបំបែកកំណត់ត្រាឡើងវគ្គផ្ដាច់ព្រ័ត្រព្រឹត្តិការណ៍ពិភពលោកនេះ។

លោករំពឹងថា វ៉ាន វ៉ុន នឹងបន្ដការខិតខំប្រឹងប្រែង និងធ្វើបានកាន់តែល្អបន្ថែមទៀតនៅវគ្គផ្ដាច់ព្រ័ត្រ ដើម្បីដណ្ដើមលទ្ធផលល្អជូនជាតិមាតុភូមិ។

សូមបញ្ជាក់ថាព្រឹត្តការណ៍ប្រកួតកីឡាប៉ារ៉ាឡាំពិក នៅទីក្រុងតូក្យូ ប្រទេសេជប៉ុន ឆ្នាំ២០២០ កម្ពុជាបានបញ្ជូនអត្តពលិក១ និងប្រតិភូ១រូបចូលរួម គឺកីឡាករ វ៉ាន វ៉ុន និងលោក យី សុភក្រ្តា ប្រតិភូ៕

^{ប្រភព ៖ ទទក}